Numbers 31

Ukuphindisela kumaMidiyani

1UJehova wathi kuMosi, 2“Phindisela kumaMidiyani usenzela abako-Israyeli. Ngemva kwalokho, uzalandela okhokho bakho.

3Ngakho uMosi wathi ebantwini, “Hlomisani amanye amadoda aye empini ayekulwa lamaMidiyani kanye lokuphindisela kukaJehova kuwo. 4Thumelani amadoda ayinkulungwane avela esizwaneni ngasinye sako-Israyeli ukuyahla-sela.” 5Ngakho amadoda azinkulungwane ezilitshumi lambili ahlomela ukuyahlasela, kuyinkulungwane yamadoda avela esizwaneni ngasinye, ebuthwe ngosendo lunye ngalunye kwabako-Israyeli. 6UMosi wabathumela ukuyahlasela, kuyinkulungwane evela esizwaneni ngasinye, kanye loFinehasi indodana ka-Eliyazari, umphristi, owathatha izitsha endlini engcwele kanye lamacilongo okubikelana.

7Balwa lamaMidiyani, njengokulaywa kukaMosi nguJehova, babulala amadoda wonke.

8Phakathi kwababulawayo kwakulamakhosi amahlanu amaMidiyani okubalisa u-Evi, loRekhemu, loZuri, loHuri kanye loRebha. Babulala loBhalamu indodana kaBhewori ngenkemba.

9Abako-Israyeli bathumba abesifazana bamaMidiyani labantwana, basebethumba lemihlambi yezinkomo zamaMidiyani, leyezimvu kanye lokubutha impahla njengempango. 10Batshisa wonke amadolobho lapha okwakuhlala khona amaMidiyani, kanye lezihonqo zawo zonke. 11Bathatha konke ababekubuthile lababekuthumbile, kuhlanganisa abantu lezifuyo, 12njalo basebeletha abathunjwa, okuthunjiweyo lokubuthiweyo kuMosi lo-Eliyazari umphristi kanye lebandleni lonke lako-Israyeli ezihonqweni zabo zasemagcekeni aseMowabi, ngaseJodani ngaphetsheya ukuvelela eJerikho.

13UMosi, u-Eliyazari umphristi kanye labobonke abakhokheli babantu baphuma ukuyabahlangabeza ngaphandle kwezihonqo.

14UMosi wathukuthelela abalawuli bamabutho – ababelawula amaxuku ezinkulungwane lababelawula amaxuku angamakhulu – ababevela ekuhlaseleni.

15“UMosi wababuza wathi, “Selivumele abesifazana ukuthi baphile na? 16Yibo ababelandela ukucebisa kukaBhalamu njalo beyilo igwegwe lokususa abako-Israyeli kuJehova kulokhu okwenzakala ePhewori, kwaze kwathi abantu bakaJehova behlelwa yisifo. 17Khona khathesi bulalani abafana bonke. Njalo libulale wonke owesifazana oseke walala lendoda, 18kodwa lizigcinele loba yiphi intombazana engakaze ilale lendoda.

19“Lina lonke elibulele loba ngubani loba lina elike lathinta loba ngubani obuleweyo lizahlala ngaphandle kwezihonqo okwezinsuku eziyisikhombisa. Ngosuku lwesithathu langosuku lwesikhombisa lizihlambulule lina kanye labathunjwa benu. 20Hlambululani zonke izambatho kanye lakho konke okwenziwe ngesikhumba, uboya bembuzi loba okwezigodo.”

21Ngakho u-Eliyazari umphristi wathi kwabebutho ababeye empini, “Nanku okufaneleyo ngokomthetho owaphiwa uMosi nguJehova: 22Igolide, isiliva, ithusi, insimbi, izenge lomnusu, 23kanye lakho konke okunye okungaze kwatshiswa ngumlilo kumele kudlule emlilweni, yikho kuzabe sekuhlambulukile. Kodwa kumele njalo kube sekuhlanjululiwe ngamanzi okuhlambulula. Kanti njalo kuthi lakuphi okungeze kwamelana lomlilo kumele kudluliswe kulawomanzi. 24Ngosuku lwesikhombisa gezisani izigqoko zenu ukuze lihlambuluke. Ngemva kwalokho selingangena ezihonqweni.”

Ukwabiwa kokuthunjiweyo

25UJehova wathi kuMosi, 26“Wena kanye lo-Eliyazari umphristi kanye labazinhloko zezimuli zabantu lizabala abantu bonke lezinyamazana – konke okwathunjwayo. 27Yabelani amabutho ayesempini kanye labantu bonke lokho okuthunjiweyo. 28Emabuthweni alwayo empini, thathani okukodwa emakhulwini amahlanu kube yisabelo sikaJehova, kumbe ngabantu, inkomo, obabhemi izimvu loba imbuzi.

29Thathani lesisabelo engxenyeni yesabo liyiphe u-Eliyazari umphristi ibe yingxenye kaJehova. 30Kungxenye yabako-Israyeli, khethani okukodwa ematshumini amahlanu, phakathi kwabantu, izinkomo, obabhemi izimvu, imbuzi loba ezinye izifuyo. Zipheni abaLevi, bona abalomlandu wokunakekela ithabanikeli likaJehova.” 31Ngakho uMosi lo-Eliyazari umphristi benza njengokulaywa kukaMosi nguJehova.

32Impango eyayisele kulokho okwathathwa ngamabutho kwakuyizimvu ezi 675,000,

33izinkomo ezi 72,000, 34obabhemi abazi 61,000

35kanye labesifazana abazi 32,000 ababengakaze balale lamadoda. 36Ingxenye yesabelo salabo abalwayo empini sasiyizimvu ezi 337,500,

37lapho abakhipha khona umnikelo kaJehova oyizimvu ezingama 675;

38lezinkomo ezi 36,000, okwakhitshwa kizo ezomnikelo kaJehova ezingama 72;

39obabhemi abazi 30,500, kwathi umnikelo kaJehova waba ngama 61;

40abantu abayizi 16,000, kwanikelwa kuJehova ngaba ngama 32.

41UMosi wanika u-Eliyazari umphristi isabelo sikaJehova, njengokulaywa kukaMosi nguJehova.

42Ingxenye yesabelo sabako-Israyeli uMosi wayeseyehlukanise leyamabutho – 43ingxenye eyayingeyabantu – yaba yizimvu ezi 337,500,

44izinkomo ezi 36,000, 45obabhemi abazi 16,000.

46kanye labantu abayizi 16,000. 47Engxenyeni yesabelo sabako-Israyeli, uMosi waqambula okukodwa ematshmini amahlanu abantu lasezifuyweni, njengokulaywa kwakhe nguJehova, njalo wakuqhubela abaLevi, bona ababelomlandu wokunakekela ithabanikeli likaJehova.

48Ngakho izikhulu ezaziphethe izigaba zebutho – abalawuli bamaxuku azinkulungwane kanye labalawuli bamaxuku angamakhulu baya kuMosi 49bafika bathi kuye, “Izinceku zakho seziwabalile amabutho eziwalawulayo, akukho lelilodwa ibutho elingekho. 50Ngakho sesilethe njengomnikelo kuJehova izinto zegolide esizitholileyo munye ngamunye – izigqizo, lamasongo, lezindandatho, lamacici kanye lezigqizo zentanyeni – ukuzenzela indlela yokubuyisana phambi kukaJehova.”

51UMosi lo-Eliyazari umphristi bemukela igolide elalivela kubo – konke lokho kungokubaziweyo.

52Lonke igolide elalethwa ngabalawuli emunye elawula amaxuku azinkulungwane labalawuli emunye elawula ikhulu lelo uMosi lo-Eliyazari abalethula njengesipho kuJehova lalilesisindo samashekeli azi 16,750. 53Ibutho ngalinye lazithumbela okwalo lalo. 54UMosi lo-Eliyazari umphristi bemukela igolide elalivela kubalawuli emunye elawula amaxuku azinkulungwane lakubalawuli emunye elawula amaxuku angamakhulu, balisa eThenteni lokuHlanganela ukuze kube yisikhumbuzo kwabako-Israyeli phambi kukaJehova.